L’È SÀ NEDÀL

È Natale

I fèste de Nedàl i è ché a troàm amò po’ a’ st’an. Ndó ‘ngir col cà ‘n di piane ‘mbiancade de la brina me góde ol zél o l’ór de la matina l’idèa de stà in vacansa però gh’è ‘l mal de pansa di regài me tóca passà ‘l dé in di centri comerciài. L’è sira e finalmènt me se rincórze -a tirà sö la claire- del büligà d’arzènt di stèle stremide del ciarùr di lüminére, che m’varda de gulùs quando in chèl angolì de cél in crùs magare gh’è scondida la cometa… La capana l’è in sala sóta la montagnèta di sòch, in del presepio l’albero l’ seghèta a fà baocèt a gh’è ‘l camì che fóga fiame e lücine i bala a i ó sognade assé quando sìe s-cèt. -Dai che m’và vià pò a’ nóter ü quach dé! -Stó mèi a cà ‘mpernóter a te l’sé. -Per forsa ‘l tò laorà l’è troàla pronta gh’è ché pò a’ i tò parécc domà de zónta e lur i porta ol sólet panetù.- Ogne tat a ‘ncrusie i öcc con chèl Bambì che l’islarga i brassì a di pastùr de gèss che ó ereditàt del nono, -a cuparina i pórta i bessutì-. Lü se l’ föss ché a l’ dirèss: -Papano, bèl progrèss chèl de ‘ndà piö gna a messa.- L’è sà Nedàl, se fói? Se m’fai? Proém a dientà per la giornada òm de buna olontà mia dóma de faciada.

Le feste di Natale sono venute a farci visita anche quest’anno. Giro con il cane per i campi imbiancati dalla brina mi godo il gelo l’oro del mattino l’idea di essere in vacanza però c’è il mal di pancia dei regali mi tocca passare il giorno nei centri commerciali. È sera e finalmente mi accorgo -tirando su la claire- del formicolare d’argento delle stelle spaventate dal chiarore delle luminarie che guardiamo da golosi quando in quell’angolino di cielo in croce magari si nasconde la cometa… La capanna è in salotto sotto la montagnetta di ceppi, nel presepio l’albero insiste a giocare a nascondino c’è il camino rovente fiamme e lucine ballano le ho tanto sognate da bambino. -Dai che ce ne andiamo per qualche giorno! -Sto meglio a casa noi soli lo sai. -Per forza il tuo lavoro è trovarla pronta ci sono anche i tuoi parenti domani per giunta, loro portano il solito panettone.- Di tanto in tanto incrocio lo sguardo con quel Bambino che allarga le braccine a dei pastori di gesso che ho ereditato dal nonno, -sulle spalle portano le pecorine-. Lui se fosse qui direbbe: -Stupidotto, bel progresso quello di non andare più a messa.- Natale è qui, che faccio? Che facciamo? Proviamo a diventare per la giornata uomini di buona volontà non solo di facciata.