Ol Matrimòne de la söra Borèla
La siura Borèla
no l'è pròpe bèla,
la gh'à sessant'agn,
la gh'à quach malàgn.
L'è pöta, che crus!
L'à mai facc murùs,
nissü i l’à vardada,
nissü i l’à sircada.
E l'era, de scèta,
mia bröta, sciurèta;
l'a pròpe facc töt
per vìghel a' bröt.
Ma caso o miràcol
ü vècio baciàcol
l'otrér la domanda
de spusa l' ghe manda.
De bòt la risposta
la manda per posta
ma töt entro ü mis
ghe ol fa la ghe dis.
E 'ntàt i riméde
che 'l tép a l' concede
la gh’à per fas bèla
la siura Borèla.
Dés décc a ghe manca,
l'è bassa de anca,
o' stòmech l'è piàt,
ol có l'è pelàt.
Con d'öna peròca
la quarcia la söca
ü mèdech provèt
i décc a l' ghe mèt,
.
Apena facc chèl,
per mèss del Pirèl
denàcc e dedré
la s' valsa ma bé.
Rangiada cosé,
la manda 'l dé adré
ü tenero invito
al presto marito.
Zà pronta in salèta
a gh'è öna senèta,
gh'è fìùr, gh'è colùr,
la siura in vigùr.
A l’vé 'l candidàt
töt quant ranginàt
co 'n mà la gianèta
con tat de pansèta.
De bröt no l'
gh'à tròp,
l'è stórt e 'mpó gòb,
per scónd i péi gris
tenzìt l'à i barbìs.
De mal gh’è negóta
töld fò de la góta
ma pör l’istà bé
lassando stà i pé…
I taca ‘l pransèt
ol manz l’è dürèt
sforsando la siura
ghe cróda i décc sura
invece l’amis
tenzit i barbìs
col nigher de sfrós
L’isporca ‘l barbóss.
La siura la spüda
la carne issé crüda
ma l’à gna spüdàt
che sura gh’è ol gat.
Per caso l’ và sóta
ol pé de la góta
e l’mèt in vigùr
del vècc i dulùr.
Lü
del mal a l’ rödèla
in bras a Borèla,
l’ghe pica in de söca,
la pèrd la peröca
e intàt la forchèta
per pura disdèta
la sbüsa ‘l sgionfàt:
Lé la perd töt ol fiàt.
Pensà che sorpresa
la copia noéssa:
la siura Borèla
coi décc che barbèla,
co stòmech piolàt
ol có töt pelàt
e lü pié d’dulùr
e sensa culùr.
Töcc du i se calcula,
töcc du i se cunsula
e dopo ‘l confront
i la fà féna in fónd.
Mia töt a s’capéss
No l’éra postéss
Perché piö che in frèssa
I à facc la promessa…